Op ons daaglikse wandeling klap ons soms tone teerpad langs tot by Southport se hoofstrand en dan al langs die see af verby Anerley en die Domba-riviermond, in die rigting van Sunwich Port. Dis sowat 6 km heen en weer.

Op ons heel eerste tog, ongeveer drie maande gelede, het ons ‘n kolgans onder die treinbrug op die wal van die rivier gewaar. Sy was besig om haar veredos reg te stryk, maar het terselfdertyd waaksaam rondgekyk vir moontlike dreigende gevaar. By nadere ondersoek het ons die donsige krosie raakgesien wat sy versigtig van die wal af in die water ingelei het. Ons het agt dobberende koppies getel.

Twee dae gelede het ons besluit om ‘n draai te maak by die rivier om te gaan kyk hoe dit met die gesinnetjie gaan. Hierdie keer het ons met die treinspoor langs tot bo-op die brug geloop en onmiddellik vier gansies raakgesien wat deur die water gegly het. Op die wal aan die anderkant was Moeder Gans met die res van die kroos en sy het angstig op ‘n klip gestaan en roep na haar dwarstrekkerige tieners in die water. Ons was verlig om te sien dat hulle nog almal veilig en gesond was.

 

Advertisements